Sýningin Aftur til Hofsstaða opnuð á Safnanótt í Garðabæ
Margmiðlunarfyrirtækið Gagarín hefur um nokkurt skeið unnið að sýningunni Aftur til Hofsstaða sem verður opnuð á Safnanótt, 3. febrúar klukkan 17.
-
Sýningin Aftur til Hofsstaða spannar sögu Garðabæjar frá upphafi landnáms til okkar daga.
Margmiðlunarfyrirtækið Gagarín hefur um nokkurt skeið unnið að sýningunni Aftur til Hofsstaða sem verður opnuð á Safnanótt, 3. febrúar klukkan 17. Sýningin spannar sögu Garðabæjar frá upphafi landnáms til okkar daga. Stór skjár og millusteinn sem þjónar tilgangi stýripinna leiðir gesti í gegnum sýninguna sem er staðsett í rými sem staðsett er á Garðatorgi 7 fyrir framan bókasafn bæjarins. Sýningin tengist Minjagarðinum á Hofsstöðum við Kirkjulund en þar er annar stærsti landnámsskáli sem fundist hefur á Íslandi staðsettur. Ný sýning í Minjagarðinum verður opnuð með vorinu en þar munu gestir geta skyggnst inn í fortíðina í gegnum sérstaka kíkja. Vefurinn afturtilhofsstada.is verður einnig opnaður á Safnanótt en fróðleikur og skemmtiefni tengt lífinu á Hofsstöðum má njóta á vefnum.
Hringur Hafsteinsson einn höfunda sýningarinnar mun segja frá sýningunni á opnuninni en þjóðfræðingurinn Dagrún Ósk Jónsdóttir mun einnig leiða börn í gegnum skemmtileg verkefni og fá þau til að hugsa aftur til landnámstímans en verkefnið er styrkt af Barnamenningarsjóði.
Fjölbreytt dagskrá á Hönnunarsafni Íslands á Safnanótt
Föstudaginn 3. febrúar verður ýmislegt um að vera á Hönnunarsafninu en dagskráin hefst klukkan 18 með hönnunarsmiðju fyrir alla fjölskylduna. Hönnuðurnir Auður Ösp Guðmundsdóttir og Kristín María Sigþórsdóttir aðstoða þátttakendur við að setja sig í spor hönnuða og uppfinningamanna og búa til húsgögn í ímyndað heimili. Í vinnustofu safnsins verður keramikhönnuðurinn Ada Stańczak að störfum en hljóðlistamennirnir Otto og Carlo ljá anddyri safnsins tónum. Þá má skoða sýninguna Fallegustu bækur í heimi á Pallinum. Klukkan 20 verður svo sýningin Hönnunarsafnið sem heimilið opnuð en við opnunina leika Jelena Ciric söngkona, Ásgeir Ásgeirsson gítarleikari og Margrét Arnardóttir harmonikkuleikari. Á sýningunni má sjá um 200 dæmi um íslenska hönnun úr safneign Hönnunarsafnsins. Sýningin er sett upp sem grunnmynd af heimili og líkt og á heimilum fólks má sjá þar muni frá mismunandi tímabilum.