Fjör á Barnamenningarhátíð- troðfull dagskrá á laugardag!
750 börn njóta dagskrár dagana 17. – 21. apríl í Hönnunarsafni Íslands, Bókasafni Garðabæjar, Minjagarðinum á Hofsstöðum og Aftur til Hofsstaða og á Garðatorgi.
Barnamenningarhátíð í Garðabæ lýkur laugardaginn 22. apríl
með dagskrá fyrir alla fjölskylduna. Dagskráin samanstendur af viðburðum sem
skólabörn fengu að taka þátt í vikuna 17. – 21. apríl en 40 mismunandi smiðjur
voru í boði fyrir skólahópa.
Á Hönnunarsafni Íslands fer fram fígúrusmiðja frá kl. 13-15 en einnig er hægt að skoða sýninguna Heimurinn heima á Pallinum. Á sýningunni má skoða skringilegasta fjölbýli Garðabæjar sem samanstendur af 12 heimilum sem sköpuð voru í hönnunarsmiðjum sem allir 4. bekkingar Garðabæjar tóku þátt í.
Á Bókasafni Garðabæjar verður hægt að föndra úr afskrifuðum bókum og einnig hægt að skoða sýninguna Músagangur á Bókasafninu sem unnin er af leikskólabörnum í Garðabæ.
Þá mun fornleifafræðingur leiðsegja í Minjagarðinum á Hofsstöðum við Kirkjulund en leiðsögn lýkur á margmiðlunarsýningunni Aftur til Hofsstaða á Garðatorgi 7.
Viðburðirnir marka lok Barnamenningarhátíðar í Garðabæ og eru allir ókeypis.
Á mánudaginn hófst því fjörið og sjá mátti forvitna og fróðleiksfúsa 7. bekkinga fræðast með fornleifafræðingi í Minjagarðinum á Hofsstöðum og sýningunni Aftur til Hofsstaða en fyrsti hópurinn af þremur mætti kl. 9 í garðinn. Á sama tíma mættu svo 3. bekkingar í Hönnunarsafnið og 5. bekkingar í ritsmiðju á Bókasafnið. Fyrstu bekkingar fengu hinsvegar að dansa í sólinni.
750 börn njóta dagskrár dagana 17. – 21. apríl í Hönnunarsafni Íslands, Bókasafni Garðabæjar, Minjagarðinum á Hofsstöðum og Aftur til Hofsstaða og á Garðatorgi.