4. okt. 2022 Fjölnota íþróttahús Íþróttir og tómstundastarf

Æfingar yngri landsliða í Miðgarði næstu þrjú árin

Garðabær og Knattspyrnusamband Íslands (KSÍ) hafa samið um æfingaaðstöðu fyrir yngri landslið Íslands í fjölnota íþróttahúsinu Miðgarði í Garðabæ. Samningurinn var undirritaður í dag, þriðjudaginn 4. október, og er til þriggja ára.

KSÍ fær til afnota aðstöðu á skilgreindum rýmum í Miðgarði á tilteknum tímum dagsins, en um er að ræða bæði knattspyrnusalinn og stoðrými, svo sem búningsaðstöðu, sjúkraherbergi, fundaraðstöðu og mataraðstöðu, dómara og þjálfara herbergi og þrekæfingasvæði með gervigrasi.

Fyrstu KSÍ æfingarnar í húsinu voru á dagskrá í september þegar að hæfileikamótun drengja fór fram. Framundan í október eru æfingar yngri landsliða.

Lifandi starfsemi í Miðgarði

 Miðgarður er fjölnota íþróttahús sem var tekið í notkun snemma á þessu ári og hafa frjálsu félögin í Garðabæ getað nýtt húsið frá opnun þess. Starfsemin í Miðgarði er lifandi á degi hverjum í mörgum rýmum fyrir utan knattspyrnuvöllinn, svo sem við klifurvegg, á göngu- og skokkbraut, á þrekæfingasvæði og í lyftingarsal. Í húsinu eru einnig óráðstöfuð rými sem vonast er til að hægt sé að nota þannig að stutt sé sem best við þá fjölbreyttu flóru íþrótta- og heilsutengdrar starfsemi sem fyrirfinnst í Garðabæ.

Almar Guðmundsson bæjarstjóri segir ánægjulegt að starfsemin í Miðgarði sé sífellt að eflast og taka á sig skýrari mynd. „Húsið nýtist fyrst og fremst ungum sem öldnum íbúum Garðabæjar en það er kærkomin viðbót að hefja samstarf við KSÍ um starfsemi í húsinu þannig að það nýtist ennþá betur. Það er jákvætt og hvetjandi fyrir yngri iðkendur í íþróttafélögum Garðabæjar að hið faglega starf og æfingar yngri landsliða fari fram í Miðgarði. Framundan er síðan spennandi verkefni við að að efla Miðgarð enn frekar með það að markmiði að Garðabær verði hér eftir sem hingað til heilbrigt og heilsueflandi samfélag.“